公屋壞升降機 維修等四日
超強颱風山竹早前襲港，多處有升降機出現故障。在葵涌大窩口邨，富德樓兩部高層升降機不敵十號風球雙雙「跪低」，影響逾一百六十戶，最頂層住戶出𨋢後要行十層樓梯才能返回住所。關注組織批評，房委會在壞𨋢期間一直無公布維修進度，四日後始與承建商安排有限度人手「揸𨋢」，苦了長者及殘障住戶。
僅提供有限度人手「揸𨋢」
「好彩我哋廿九樓咋，再高啲都唔掂！」自上月十六日壞𨋢以來，曾先生每日都托着裝滿日用品和餸菜的手推車，在廿八樓出𨋢再行樓梯回家。其年過九十的母親行動不便，打風後猶如被困家中，曾坦言無能力帶母親落樓。「我都六十幾歲人，唔通我抱佢上樓梯咩！」直至二十日晚上，才有承建商人員到大廈人手操作其中一部高層𨋢，惟服務僅限早晚繁忙時間。
富德樓樓齡廿五年，自入伙後無更換過新𨋢。工聯會社區幹事陳安妮批評，房委會無就今次故障交代搶修所需時間，令居民難以應變。「如果早講整幾耐，老人家可以去仔女屋企暫住幾日，特別係獨居長者，結果搞到佢哋又去唔到覆診，又買唔到餸。」陳促房委會日後工程招標前宜先考慮承建商今次表現。