「我哋話OK就OK！」呢句說話簡直係官場金科玉律，唔止港鐵沙中線醜聞啱用，民航處應對九霄驚魂質疑一樣Fit晒。好似新空管系統日前又爆大鑊，一度陷入六分鐘無王管狀態，嚇到大家個心離一離，之但係民航處一句「航空安全不受影響」就輕輕帶過，言下之意又係我哋話OK就OK，唔到你唔服。
嗱，事發於星期一下晝四點幾，新空管系統嘅飛行數據處理系統突然跪低，所有工作席位均受影響，足足搶修半粒鐘先至恢復正常，期間要轉用二號系統頂檔，有三班航班只能顯示航班位置、高度等三項重要資訊，其餘嘅航班呼號、飛機型號等訊息統統顯示唔到，飛機隨時炒埋一碟，都咪話唔牙煙。至於出事嘅一號系統最終又要重啟先至郁得番，有冇再化學啲吖。
睇到喇，大拿拿十五億元嘅美國貨仲衰過屋企部電腦，郁啲就冧檔，郁啲就boot機，咁都靠得住，豬乸會上樹喇。不過咪以為民航處會知衰呀，實情啱啱相反，該處又係一副輕描淡寫口脗，聲稱為審慎起見曾短暫延遲放行離境航班約六分鐘喎，期間冇影響航空安全喎，已責成承辦商調查同交報告喎。
喂，新空管系統明明搶修半粒鐘先至恢復正常，明明部分航班嘅重要訊息無法顯示，同喺空中隱形冇乜分別，擺明係非常嚴重事故，何況飛行數據處理系統係空管系統嘅核心部分，民航處簡化為「延誤六分鐘」了事，即係巧言令色啫。再講吖，承辦商自己查自己，大鑊唔爆完又爆至奇嘞。正如本身係民航機師嘅立法會議員話齋，若然全港交通燈壞咗六分鐘會有咩後果，三歲細路仔都知，咁都話冇影響航空安全，都好不負責任啫，唔通真係要機毀人亡至算出事咩。
真係諗起都驚，空管系統指揮整個空中交通，話係大腦同靈魂都冇誇張，偏偏新系統啟用唔夠兩年，鬼機、疊影、誤鳴、飛行間距不足乜都齊，故障數字仲創下多年來新高添。試諗吓，一個冇腦冇靈魂嘅系統，加上冇腦冇靈魂嘅民航廢官，後果點會唔係災難性呀？最怕好嘅唔靈醜嘅靈，一旦搞出大件事，呢隻鑊邊個孭得起呀？
一句講晒，港府冇神經冇靈魂，幾匪夷所思嘅事都會發生，空管亂象只係冰山一角咋，由國家級基建延誤超支，到港鐵沙中線醜聞不斷，再到港獨沉渣泛起，有邊一次唔係港產官僚無能惹的禍吖？有人建議港府放棄呢套垃圾空管系統，招標買過套新嘅，計功夫茶話齋，換走爛系統之餘更應換走垃圾官，否則治標唔治本。