政情：史立德遊星洲 見證外勞助經濟增長
香港中華廠商聯合會副會長史立德（Allen）最近頻頻到一帶一路沿線國家行吓，呢兩日佢就去咗新加坡。佢話以前去過新加坡多次，覺得呢個國家成日要同香港爭一日之長短，唔係咁鍾意。今次再去係想探討及了解吓佢哋嘅最新發展及經濟情況，二來順便去探訪朋友。此行發覺人哋真係發展得好快，其中輸入外勞政策功不可沒。
Allen話新加坡同香港一樣唔夠勞動人口，請唔到人就要靠外勞，新加坡嘅外勞主要來自馬來西亞，依家仲引入埋中國大陸勞工。外勞每次申請可獲批准兩年工作簽證，到期可再申請延期。
慨嘆冇香港咁多包袱
佢慨嘆話，新加坡冇香港咁多包袱，政策夠晒靈活，唔怪之得行得快過香港啦！
一場來到，自然要周圍睇吓。Allen話當地近年積極發展旅遊業，起咗好多硬件配套，包括新酒店及機場客運大樓，依家第五個客運大樓及跑道都起緊，睇嚟香港有排追趕嘞！