政情：李永成愛運動 趁落區玩獨木舟
區議員平日唔單止要開會，好多時仲要落區服務市民，搞到啲時間好緊湊，甚至忙到做唔到自己想做嘅嘢添。沙田區議員李永成自細就好鍾意做運動，但係依家區議會工作忙碌，冇乜時間做運動，惟有寓工作於娛樂。平時會代表區議會踢吓波、跑吓馬拉松咁，有一次仲同其他區議員趁巡區期間划獨木舟添！
工作忙 有機會盡量食飽啲
熱愛運動嘅李永成其實係運動好手，中學時期仲同一時間係足球、籃球、羽毛球及乒乓球校隊成員添！不過依家忙成咁，佢話唔止冇時間做運動，連食飯時間都欠奉，經常夜晚九點幾、十點先食到晚飯。佢笑笑口話，所以佢本住「有得食就食」嘅心態，平時一有機會食嘢就會盡量食多啲、飽啲，因為唔知幾時先有得食喎。雖然好似「焚化爐」咁食嘢，再加上冇乜點做運動，但佢嘅體重又冇增加喎，相信唔少人都好羨慕喇！