政情:查毅超賣甩老婆 為楊偉雄赴飯局

香港科技園公司董事局新主席查毅超(Sunny)上任一個半月,尋日首次由公司管理團隊陪同下與傳媒見面。Sunny更自爆,為咗出席創新及科技局局長楊偉雄邀請嘅飯局,決定「賣甩」老婆喺屋企,仲戲稱:「可想而知我同局長關係幾好喇!」

話兩人關係唔錯

Sunny更笑稱,上任後多咗好多白頭髮,可能係年紀問題,亦可能係多咗嘢做。佢幾日前亦向園區公司廣發「英雄帖」約眾人見面,至今已收到過百個回覆,下一步佢亦希望可以單獨見晒所有公司同事聽意見,豪言「我落得嘅單就一定會做」。至於同楊偉雄關係又如何?Sunny爽快稱:「都唔錯o架!」

佢話前日朝早出門口,老婆好凌厲咁問「你今個星期又唔返嚟食飯啊?」佢即刻耍手又擰頭,答應聽晚一齊食飯。到咗下午開緊董事局會議時,有一個不知名電話不停打嚟,最後先知係楊偉雄助理,邀請佢聽日去科技大學出席一個活動,兼且今晚要先同活動出席者食飯。科技園公司澄清,話當晚飯局楊偉雄無份,Sunny係單拖應邀出席。

第一手消息請下載on.cc東網iPhone/iPad/Android/Windows Phone Apps