政情：葉劉擬戰超區周浩鼎爭崩頭

葉劉過去都係循香港島地區直選進入議會，今屆更以票后姿態當選，所以下屆再循香港島出選，議席可謂十拿九穩。不過，佢喺上年突然表示有意參加中西區山頂選區補選，但後尾又以時機唔適合為由未有出選，而且留有後路，講明唔排除再有機會戰區議會選舉，當時政圈就傳出，佢其實係為二○二○年鋪路，以轉戰超區助黨內第二梯隊上位，但葉劉一直未有對外承認呢個部署。

不過，葉劉尋日接受立法會前議員劉慧卿訪問時，就表明希望有機會出戰超區，將香港島嘅出選機會讓予黨內年輕人。佢更直言此舉有風險，因自己未必成功當選，但佢與參選香港島嘅黨友一齊宣傳同拉票，就能夠發揮一加一嘅效果喎。

佢進一步解釋，指年輕人進入議會後，需要有資深議員帶住去熟習程序，而其所屬政黨新民黨人數少，若然佢唔轉戰超區只排地區直選名單第二，會較難進入議會，而且黨友容海恩能否連任都好難講，所以為咗政黨發展，就只好自己辛苦多一屆。

民記人滿為患 建制恐兩敗俱傷

咁有冇乜心水會去參選邊個區議會選區？佢就保持神秘話仲未揀好，但會以勝算作為考慮條件，咁係咪揀中產區呢？佢又話想測試下自己，又話自己喺基層都有支持，而且又有好多新區，直言有好多選擇喎，不過一切都言之過早，仲要經過黨內磋商喎。佢更講明，希望喺揀選區落腳一事上，盡量唔好同人鬧交，會盡量靠自己搵區唔使鬧不快咁話。

現時立法會中一共有五個超區席位，但過去建制派都只能取下兩席，所以葉劉決定加入混戰，最受影響就係現時循超區進入議會、只係做緊第一屆立法會議員嘅周浩鼎。而周浩鼎所屬嘅民建聯（民記）正值人滿之患，即使佢身為離島區議員，都難有位置改喺新界西出選，但如果堅持出戰超區而有建制派內訌局面又隨時兩敗俱傷，所以葉劉今次真係考起民記點樣應變喇。