中環出更：轟監管基建現漏洞 謝偉銓幫業界爭飯碗
港鐵沙中線近期接連爆出鋼筋剪短造假、結構牆被削薄，以及多個監測點沉降超標等工程醜聞。立法會建築、測量、都市規劃及園境界議員謝偉銓（Tony）最近趁抖暑離港休假，但尋日發新聞稿炮轟港府及港鐵，話監管鐵路基建工程嘅制度出現漏洞，而且冇充分利用測量師嘅專業，敦促政府改善喎。
指缺乏第三方專業監察
Tony更舉例，指港鐵部分工程獲豁免，不受《建築物條例》監管，毋須經屋宇署署長及其轄下的專業建築測量師審批部分圖則或發出施工許可等，變相依賴港鐵或承建商本身的工程師自行監管，缺乏獨立第三方嘅專業監察喎。
佢又提出，政府應該善用專業建築測量師及工料測量師，嚴控及減少延誤、超支或工程不依規格的情況，提升本地建造工程質素，保障市民安全。睇嚟Tony就算去旅行都睇唔過眼，越洋都要鬧爆政府兼幫業界「爭飯碗」！
卓妮