中環出更：太忙行唔開伍威全歎冷氣當避暑
今年北半球迎嚟熱浪，香港雖然未見破紀錄高溫，但係悶熱就少不免，唔少市民都會趁暑假外遊避暑，不過美心集團執行董事伍威全就忙到行唔開，卓妮早前見佢喺公司附近嘅中環歷山大廈同老婆阿女食午餐，歎冷氣就當消暑。
伍威全一家人用咗差唔多兩個鐘食呢餐飯，尾段見佢拎起個碟「掃清」所有嘢食，佢事後話因為自己都係做飲食業，習慣唔會食剩嘢浪費食物咁話。佢之後又買咗個蛋糕，等老婆走咗之後，先慢慢返公司再忙過。雖然伍威全係喺集團旗下嘅餐廳食飯，但係佢就無恃住老闆身份，照樣畀錢埋單，非常均真。
至於點解唔趁暑假陪屋企人離港旅行，伍威全解釋因為暑假要成日中港兩地咁走嚟走去，而內地航班經常因為空管原因而延誤，笑言唔好話旅行，連朋友飯局都可能會失約，所以陪阿女過暑假嘅重任就落喺老婆身上。
天氣炎熱 周國豐留商場等車
同樣好忙嘅仲有亞洲電視已故前主席邱德根嘅兒子邱達昌，佢喺歷山大廈急步經過，落扶手電梯時不忘拎出免提裝置，之後就拎部智能電話係咁撳，似乎想揀歌聽吓，不過見佢未戴好耳機，已經一支箭咁上咗架車，似乎非常趕時間。
至於社交名人周國豐（Brandon）亦怕咗戶外嘅炎熱天氣，等車期間留喺商場內歎陣冷氣，隔住道玻璃見到架車到先離開冷氣範圍。見Brandon喺商場撳電話期間好似愁眉深鎖咁，佢就話係因為工作太忙，不過仍然抽到啲時間陪屋企人去西班牙坐郵輪，之後去英國玩咗幾日，咁已經當放咗暑假。
卓妮