政情：街工再走22人阿忠無情唔挽留
向來為勞工發聲嘅街坊工友服務處（街工），早排爆出副主席兼立法會議員梁耀忠（阿忠）疑解僱旗下「勞工組」三名職員事件，結果引爆連串退會潮，繼早前五名執委宣布退出執委會同埋街工，尋日又有廿二名會員宣布退會，仲鬧爆阿忠「一人專政」、財政唔透明，係無良僱主。阿忠隨即發出聲明，聲稱對於共有六名執委辭職及會員退會事件責無旁貸，話感到惋惜但尊重佢哋意願，強調會盡快整頓會務，補選新一批執委。咦？阿忠無挽留辭職或退會人士，仲話要拿拿聲搞補選填補空缺，好似無情咗啲喎。
被鬧爆專政 隱瞞財政
退會嘅廿二名會員中，包括最早發生解僱糾紛嘅勞工組職員黎治甫及王曉君。佢哋尋日親述事件經過，鬧爆阿忠逃避對話、隱瞞街工財政狀況。有前執委仲指控話，曾經三次被阿忠要求退會添。咁到底勞工組三人去向如何？黎治甫就話，三人已收到五月份嘅人工，佢問過阿忠六月份人工點，但阿忠話「你月尾打簿咪知」。同時，佢話三人到依家都未收到解僱信，而且三人都有個案要跟進，所以仲會繼續工作。
阿忠：惋惜但尊重決定
幾個鐘之後，阿忠聯同廿六個街工資深會員親自交代事件，並發表聯署聲明。阿忠話近年街工陷入嚴重內部分歧同埋財赤，但最終喺財困問題上分裂，覺得好可惜，不過對於佢哋嘅決定表示尊重。阿忠仲反駁「一人專政」嘅指控，稱街工唔係佢一個人話事，內部有機制處理，自己下屆都未決定選唔選，仲話要參選係需要會員大會通過。
對於黎治甫等三人嘅問題，阿忠話上年畀咗勞工組七十萬元營運資金，希望佢哋未來自負盈虧，但佢哋至今都冇交過工作報告。佢又強調自己冇畀過解僱信，如果未來要遣散，會跟足勞工法例去處理。
唔少資深會員同埋職員都出聲力撐阿忠，有人話，近年有唔少年輕會員加入呢個扎根於葵青區嘅勞工團體，對街工工作貢獻很大，但大家對於街工嘅定位同埋方向有分歧，近日因為財政問題而令分裂公開化。