中環出更：姚祖輝美國半工讀：餐廳侍應最好賺
做暑期工幾乎係人生必經嘅事。早前香港青年聯會（青聯）為今年舉行嘅暑期實習計劃搞啟動禮，一眾青聯中人都分享自己當年嘅實習經歷。暑期實習計劃創辦人、青聯前主席姚祖輝話，佢喺美國求學時都試過打工，嗰陣點止做暑期工咁簡單，為咗幫補生活費，係要持續做兼職賺錢。講到最賺錢嘅工作，非餐廳侍應莫屬，每日淨係貼士都有成一百美元咁多添！
姚祖輝話，當時一個學期學費都只係四千美元，所以如果勤力啲，其實唔止賺到生活費，連學費都可以賺番嚟！家族做玩具生意嘅青聯副主席顏明潤都話，小學已經開始做暑假工，雖然係喺屋企幫手，但由接待、包貨到送貨都做過晒，至於正式出去打工就要數到讀大學時喇！
蔡德昇實習要賣女性內衣
顏明潤話，讀大學時初初冇諗住做暑假工，放假當然係休息吓、玩吓。不過有一日瞓醒時，竟然諗唔到要做咩好，所以就搵工打發吓時間。佢今時今日都仲好記得「冇嘢做」嘅感覺，笑稱唔想呢種感覺再出現喎！
同場仲有青聯主席郭永亮、常務副主席蔡德昇及秘書長何迪夫等人。相信好多人都聽過蔡德昇實習時賣女性內衣嘅故事，佢話當初被百貨公司取錄時，唔知會被分派去女性內衣部，一開始佢都打個突，覺得好尷尬，不過做落發現原來呢個部門都有唔少男人，仲做得好專業添！
而且客人好少用「有色眼鏡」睇佢哋，所以賣女性內衣並冇想像中咁困難喎。
卓妮