一件污，兩件穢，唔通三件真係冇所謂？近年本港大型基建唔係延誤就係超支，早就見怪不怪，好似高鐵同港珠澳大橋吖，兩項都係國家級基建工程，兩項工程都係超支延誤不斷，以為好不容易捱到尾聲啦，點知兩項工程都接連揭發質量問題。咪以為冇所謂呀，搞唔好分分鐘車毀人亡o架。
都唔知係咪流年不利，港珠澳大橋人工島日前先至被航拍機拍到疑似崩堤現象，當局連聲否認冇耐啫，又輪到高鐵出事。呢，廣深港高鐵香港段今個月開始試驗營運，殊不知試咗第三日就嚟料，港鐵員工當晚九點幾發現一列停泊喺維修車庫嘅高鐵列車，尾卡八個車輪當中有四個出軌，真係大鑊！港鐵即時停止試運並進行詳細調查，機電工程署亦要求港鐵交報告。尋日話初步發現路軌承托工字鐵輕微變形喎，真係聽到人抹一把冷汗。
喂，列車出軌唔係講玩，今次好彩係試車啫，萬一將來通車先至爆大鑊就不堪設想咯。你話喇，呢條耗資八百多億元興建嘅天價鐵路，係咪一波多折吖？係咪好事多磨吖？超支延誤唔在講，家陣仲驚爆安全隱患，市民唔膽戰心驚就假。都仲未計「一地兩檢」本地立法嗰筆，莫講話反對派必定一反到底，建制派亦係唔爭氣，日前立法會審議《廣深港高鐵（一地兩檢）條例草案》，竟然搞到流會收場，建制派「多人失蹤」應承擔主要責任。連行會成員都開口話擔心趕唔切完成立法程序，高鐵今年第三季通車就會泡湯，唔係杞人憂天o架。
這邊廂，高鐵搞到一鑊泡；那邊廂，港珠澳大橋一樣令人冇眼睇。雖然當局否認人工島出現崩堤，仲話係錯覺添，但有專家就持不同睇法，前土力工程處處長質疑人工島防波堤被海浪沖散，可能同地基不穩或堤石抵禦力不足有關，要求當局徹查。講真，港珠澳大橋施工至今，中港兩段已有十八名工人死亡，就知「奈何橋」名不虛傳，外界擔心施工質量有根有據，偏偏當局一味含糊其詞，市民愈聽愈心驚就係咁解。
睇到啦，本港大型基建問題多多，最弊唔止國家級基建亂象叢生，本地基建都係一擔擔。好似港鐵沙中線吖，超支百多億元至成本飆升，成為香港首條千億鐵路，仲貴過高鐵，問你死未。再講啟德郵輪碼頭吖，十室九空不特止，最近仲鬧出歧視本地郵輪客醜聞，擺明趕客啦。
冇計嘞，香港回歸後行背運，政治爭拗不斷，社會發展停滯不前，家陣林鄭仲話要玩大和解喎，倒行逆施，天怒人怨，香港想唔死多兩錢重都難！