政情：待產王政芝長假閉關安胎

今個星期有復活節同清明節嘅公眾假期，唔少人都請多幾日駁個長假期外遊，去吓旅行歎世界，但新民黨青年委員會主席王政芝（Gigi）就叫苦連天喇，因為下個月係佢預產期，第二個女準備出世，依家大住個肚唔坐得飛機，所以只可以睇住身邊啲朋友周圍去，自己只能乖乖留喺香港安胎。

其實Gigi一早預咗呢個情況，平常懷胎三十二周就唔可以上飛機，所以佢喺二十五至二十六周，即係大概農曆新年前帶埋大女去咗台灣一趟。有冇驚上唔到飛機？Gigi就話唔驚，因為當時個肚都唔係好大，上飛機都冇人查佢，成個旅程都順利。

但佢返嚟之後就逐漸消失喇，之前立法會補選已經冇辦法出嚟幫手，只可以喺屋企精神上支持黨友，而嚟緊佢都要暫停所有活動，預計最快都要六月，坐完月之後先會再公開露面。至於來年會唔會再參選區議會，佢就話太長遠，所以暫時都未知，到時睇吓黨點安排啦！