政情：立會巴西「睇肉團」 索價三萬八
舊年三月發生巴西肉類品質問題事件，引發全球對巴西出口肉類產品品質嘅關注。立法會食物安全及環境衞生事務委員會將於八月十二至十九日到巴西聖保羅，了解當地肉類食品生產及進出口情況。八日「睇肉團」以經濟客位來回機票計算，花費近三萬八千元，當中包括五百多元嘅接種疫苗費用。
預防黃熱病 仲要捱一針
根據立法會文件，睇肉團八日行程費用近三萬八千元，如改乘商務客位，費用將增至近八萬元。每位議員可獲公帑資助嘅海外職務訪問費用都只係五萬五千元，今次花費都幾重皮。委員會主席何俊賢話，佢已經預留時間八月去巴西外訪，唔擔心因為費用高昂而令議員卻步，因為香港四至六成肉類都來自巴西，作為議員去了解清楚都唔過分。不過，佢就提醒議員要提早注射預防黃熱病疫苗，因為唔打針入唔到境。
講起打針，立法會議員麥美娟曾經喺立法會注射流感疫苗時因為怕痛而大聲嗌，佢今次會唔會因怕打針而唔去巴西呢？麥美娟話佢唔會因為怕打針而唔去，但今次佢就真係冇諗過報名喎。