政情：民調：泛民敗選 無礙施政

市民指敗選意料中事

民主派喺上月立法會四席補選中輸咗兩席，唔止首嘗喺地區直選補選中敗陣，更令佢哋喺多名立法會議員被取消議員資格後，繼續失去立法會分組點票否決權。不過市民對此似乎反應不大。香港中文大學香港亞太研究所喺上個月二十一日至二十六日、即立法會補選後，以電話訪問咗七百三十三名香港市民。根據民調結果，對於民主派敗選，雖有三成九受訪者表示感到意外，但認為係意料中事嘅都有三成七人，兩者相差好少。

至於今次補選結果會唔會令市民擔心立法會議員監察政府嘅能力會下降，又或者對未來政府施政有影響呢？民調結果就反映，只有三成六受訪者擔心議員監察政府嘅能力會下降，三成四人表示唔擔憂，覺得「一半半」嘅就有兩成四人。另外，三成六受訪者都認為補選結果對政府施政冇影響，認為有好影響及壞影響嘅受訪者就分別佔約兩成九同近兩成二。

支持度降低 不獲睇好

值得留意嘅係，喺是次民調當中，有近三成九嘅受訪者都同意泛民主派喺立法會選舉嘅支持度將會漸漸降低，表示唔同意嘅只有兩成一人，另有三成二人就覺得「一半半」，可見市民都唔睇好民主派喺立法會嘅表現，甚至係減少對民主派嘅支持。

嚟緊將可能舉行立法會剩餘兩席嘅補選，立法會換屆選舉亦將喺兩年後到嚟，如果民主派再唔痛定思痛、深切反省，仲以為市民實撐佢哋，唔努力去爭取市民支持，到時真係攬住喊都得喇！