中環出更：重複犯錯？ Greg蘇再騷卡片

商務及經濟發展局前局長蘇錦樑（Greg蘇）自○八年加入政府，直至舊年先離開熱廚房，雖然喺官場打滾接近十年，但就被彈多過獲讚，其中卡片風波就最令人印象深刻添，而佢尋日喺Facebook上，竟然再次大騷卡片，唔通佢又重複犯錯？

Greg蘇任內政績欠奉，好似美食車、免費電視牌照、版權問題等都留下爛攤子，亦欠缺政治智慧而搞出國籍風波，佢喺○九年做商經局副局長時，更以卡片代替入息證明為菲傭續約，結果鬧得滿城風雨，連累埋入境處受靶，所以今次再騷卡片難免會令人聯想起佢嘅往事。

不過，無官一身輕嘅佢再騷卡片其實唔會有問題，因為重返律師樓嘅佢，大騷新卡片只為向朋友更新通訊地址同電話以保持聯絡啫！

Greg蘇上星期獲批准重返廿年前有份開設嘅律師樓，日前已經正式返工，而佢上載新卡片時更形容係新鮮出爐，足見佢熱切期待開展新工作，唔少工商界及政界人士見佢開始投入新工作後，都紛紛留言恭喜佢，當中仲包括過去多次批評佢嘅立法會議員葉劉淑儀添！

卓妮