中環出更：細個曾遇溺 黃金寶自爆淆底
前世界單車冠軍黃金寶踩單車叻就個個都知，佢早前出席保良局一個泳池綜合大樓開幕禮時，自爆游水唔叻，唔熟水性，細個仲試過遇溺添！嗰次都有少少淆底呀。睇嚟人真係冇完美，唔會樣樣運動都叻嘅。
黃金寶講起，細個同家人一齊去游水，點知揸池邊位時跣手，之後抓唔番個池邊，而家人好似忘記咗佢嘅存在咁，好彩佢死抓爛抓，先抓得番去邊位，自此都有少少怕游水，但就冇因此而唔游，亦唔係佢嘅主要興趣嘞，依家淨係游蛙式，游自由式唔識回氣喎。至於保良局前主席陳細潔一向都好鍾意運動，講起游水，佢話廿幾歲時喺南華會學游水，聽講個老師係國家運動員嚟o架，佢乜嘢式都學晒，淨係唔識蝶式，因為起得唔夠高，游唔到個形態。
鄧宣宏雁上游水堂詐病
總理鄧宣宏雁唔識游水，佢話細個好怕水，一上游水堂就詐病，所以都要囝囝學識游水，囝囝細個學游水大哭，佢都覺得好心痛，但又覺得一定要小朋友學識，有乜嘢事都可以自救，囝囝學識游水後都有好多好處，以前好鍾意食嘢，所以好肥，學識游水後都瘦咗好多。佢又話依家成日有個笑話，就係啲女仔問男朋友，「你媽媽同我跌落水，你會救邊個」，男仔就會陷入兩難，所以作為媽媽要快啲開始學游水，自己可能都好快要搵個教練學吓。
保良局顧問局成員鄭錦鐘就話當年做保良局主席時，有份推動呢個泳池綜合大樓項目，依家終於開幕，佢都特別過嚟見證呢個時刻，佢話自己嘅小朋友都識游水，亦都係好自發咁學習，頂多係太太帶佢哋去學o架啫，而佢個仔、新任立法會議員鄭泳舜游水都OK，仲參加三項鐵人賽添！
卓妮