政情：郭偉強借咪用 麥美娟嫌棄？
立法會尋日召開大會，喺首條口頭質詢環節時，工聯會議員郭偉强喺追問發言時，突然有強烈嘅干擾聲，大家嘅目光都投向佢身上，懷疑佢部手機放得太近影響支咪。郭偉强即時舉起雙手，表現極無奈，而主席梁君彥就請佢先借用鄰座、同屬工聯會嘅麥美娟（Alice）支咪發言，但聽聞Alice有啲唔係咁想同郭偉强共用支咪喎。
事後換咪套 驚唔衞生
郭偉强喺質詢完結後話唔知點解支咪會係咁，強調部電話放喺枱面，但冇響過所以唔會干擾到，秘書處已派人幫佢換咗支咪，但係唔知可唔可以再用到。
佢又大爆，當佢借用完Alice支咪後，Alice就要求職員幫佢更換咪套，笑稱唔知係咪驚佢噴晒啲口水落去。最近流感爆發，大家衞生啲都好嘅，希望換完支咪冇事，唔係嘅話秘書處就要幫Alice準備多幾個咪套喇！