政情：車公廟調籤烏龍 莫錦貴請教專家化解
仲記得今年大年初二新界鄉議局前往車公廟求籤時，爆出將靈籤掉轉嘅疑雲，成為農曆新年期間市民茶餘飯後嘅熱話。沙田鄉事委員會主席莫錦貴事後就話，會搵知名堪輿學家求教，而日前佢更透露已經搵咗對方，到底可以點化解呢？
疑似掉轉籤事件啱啱過咗一個月，但莫錦貴相當有效率，唔使一個月已聯絡咗廣東真步堂第三代傳人蔡伯勵，將大年初二當日求籤嘅流程詳細寫畀蔡伯勵過目，目前就等待對方回覆啫！不過，莫錦貴就話車公廟求籤係道教儀式，蔡伯勵初步指拜神事宜冇乜特別問題，但搵番道教人士去處理較為適合，而莫錦貴就決定等埋蔡伯勵回覆，先再諗下一步點做。
將改善大年初二求籤流程
莫錦貴仲話會視今年求籤烏龍疑雲為契機，將以後嘅大年初二求籤流程作改善，直言係追求完美，希望可以令往後嘅求籤活動都做得好同順利，唔使再惹人話柄。佢又透露，平日沙田鄉事委員會嘅活動，只要涉及擇日等堪輿事宜，都不時請教蔡伯勵，難怪今次咁快聯絡到佢喇！