政情：踢波先嚟開會 立會足球隊讓路
踢波先嚟落雨固然可惜，踢波先嚟開會同樣令人煩惱。話說立法會《廣深港高鐵（一地兩檢）條例草案》委員會（下稱委員會）早前加開一場公聽會，定於下月七日舉行，同立法會足球隊出外打友誼賽嘅日子撞到正，球隊召集人、漁農界議員何俊賢決定將球賽延期，「讓路」畀一地兩檢。
友誼賽撞正公聽會
立法會足球隊當日原本同新界東醫院聯網青少年泌尿治療中心足球隊舉行友誼賽，但點知殺出個一地兩檢公聽會。由於立法會足球隊出戰時必須有六名議員落場，為免因部分議員去咗踢波，令公聽會有任何差池，何俊賢向秘書處要求代為就友誼賽改期，最後賽事延期直至另行通知。
何俊賢話不論建制派抑或民主派，都重視公聽會內公眾對一地兩檢嘅意見，認為改期決定係合適。隊員張國鈞係委員會副主席，上星期嘅首場公聽會亦有份主持會議，第二場公聽會肯定走唔開，佢承認公聽會需要議員坐鎮，以防有任何人「突襲」阻礙公聽會進行。