中環出更：馬逢國疑投錯票 「贊成」朱凱廸拉布
立法會工務小組委員會尋日審議工程項目，議員朱凱廸又提中止待續「拉布」，而喺表決時，建制派議員馬逢國就疑似投錯票，「贊成」中止待續，但該議案終遭否決。
會議討論拆卸喺銅鑼灣、被形容為「地王」嘅加路連山道用地現有上蓋建築物，包括機電工程署前總部嘅上蓋建築物、民眾安全服務隊前大樓等。朱凱廸強烈反對呢個項目，質疑政府「打死狗講價」，喺未更改土地用途前，就申請撥款拆卸呢啲建築物，所以要提出中止待續，仲話唔係輕率提出o架！
中止待續終被否決
但多名建制派議員都唔同意朱凱廸嘅講法，馬逢國亦表明原則上支持項目，但到咗表決時，佢就疑似投錯票，「贊成」中止待續，好彩該議案最後被否決啫。
另外，喺討論呢個項目時，議員田北辰提問時話，希望政府確認小組主席盧偉國所講該建築物已成為危樓嘅言論係咪屬實，唔能夠維修。盧即刻澄清，但田北辰一度打斷盧嘅說話，並要求盧補回時間畀佢。盧即大動肝火，「你唔使咁緊張個時間，但係你既然指名道姓話主席講過啲乜嘢，我要澄清番，我並無引述官員話嗰度係危樓」，佢指自己只提及政府僅指有石屎剝落等狀況，維修重用成本好高。最終田北辰道歉，指自己冇聽到成本高。
卓妮