政情：升呢後首落區陳浩濂似「返娘家」
原任中西區區議員嘅財經事務及庫務局副局長陳浩濂（Joseph），自去年八月加入熱廚房，由區議員「升呢」做副局長之後，尋日下午陪同局長劉怡翔落區，仲探訪中西區區議會，Joseph笑稱感覺好似「返娘家」喎。
Joseph話，今次係佢上任後第一次以副局長身份「返娘家」，一行人到訪士美菲路街市。佢笑言上次以中西區環境改善及綠化美化工作小組主席身份檢視街市嘅衞生情況，今次就以副局長身份與商戶交流，討論電子支付嘅應用。
其後佢又同中西區區議員會面，返到熟悉嘅會議室同一班舊同事見面。雖然身份由代表市民向政府官員提問，換成代表政府回答議員嘅質詢，不過佢話舊同事同議員都好熱情，有人更恭賀佢「升呢」，難怪佢咁開心喇。