政情：方國珊清純舊相 網民勁受落
近日網上社交平台流傳多張美女舊照，惹起網民熱議，而相中女仔眼仔睩睩，眉目清秀，着住件橙色間條T恤，頭髮微濕，真係睇見都心動，原來呢位靚女就係西貢區議員方國珊。
網上流傳嘅多張方國珊嘅舊照，除咗有濕髮造型，亦有佢回眸一笑嘅舊照。見佢當時面尖尖，而且笑容甜美，簡直可以迷倒一眾少男！仲有一張就係佢嘅中文大學學生證，相中嘅佢當時廿四歲，打扮亦都相對成熟。
笑言自己年少無知
方國珊接受訪問時指，濕身照係作為泳隊成員嘅佢訓練後影嘅，至於回眸相就係趁兒童節目去拍外景時所攝，仲講笑話自己年少無知添。方國珊剛喺立法會補選中落敗，但就取得六萬幾票，創下個人多次參選嘅得票紀錄。如果呢幾張大獲好評嘅舊照喺投票前曝光，唔知可唔可以改變佢落選嘅結果呢？