政情：泛民嗌反面 葉劉又話遭恐嚇

被批限制發言時間

今次葉太又點樣被恐嚇呢？事緣身為《廣深港高鐵（一地兩檢）條例草案》委員會主席嘅葉太，喺尋日開會期間多次被議員批評限制議員發言時間，喺會議尾聲交代下次會議事宜時，公民黨郭家麒仲批評佢做法肉酸，質疑佢收「柯打」做嘢。

被鬧嘅葉太隨即自爆，話有議員喺搭升降機時同佢講話隨時會反面，搞到佢好不安。喺會議完結後，大家追問葉太到底畀邊個恐嚇時，葉太就只係話「有個泛民議員」。現場有泛民議員亦都追問，到底呢位議員係男定女，又問佢係咪覺得受恐嚇時，葉太就話除咗覺得受恐嚇，仲覺得有壓力添。

曾指遭李兆富恐嚇

記得去年底，經常鬧爆領展嘅葉太爆料話，李兆富同袁彌昌講「叫葉劉好收手啦喎，再唔收手呢，就會郁佢啲區議員」。結果掀起一陣小風波，袁彌昌否認李兆富用「郁、搞、收手」等字眼，但就話李嘅訊息確實有警告同提醒嘅意味，至於領展方面亦多次否認恐嚇，事件仲搞到要由警方跟進添。

講開又講，其實葉太受壓都唔係第一日嘅事，事關佢主持立法會人事編制小組委員會時，因為對議員嘅限制太寬鬆，搞到政府不滿，仲投訴佢。太寬鬆就被政府投訴，今次強硬啲又被班議員鬧，難怪葉太會覺得受壓啦。

此外，運輸及房屋局局長陳帆尋日都有出席會議，繼早幾日噏錯香港係奉行三權分立之後，尋日又再噏錯嘢，將街工議員梁耀忠叫錯做「張議員」，睇嚟陳帆真係要檢討吓喇。