中環出更：投訴鄭泳舜 民協選後補鑊慢半拍
建制派早前喺立法會九龍西補選有所突破，首次喺單對單情況贏取議席，而民協就被指助選不力令到票倉失守。不過，民協尋日竟然有新動作，就係去廉政公署舉報勝選嘅民建聯鄭泳舜，唔通係選後先扮積極去補鑊？
民協嘅深水埗區議員楊彧早前獲得一段鄭泳舜嘅錄音，內容係着選民投票畀佢後，可以登記領取福袋，所以尋日民協就拉隊去舉報。佢哋一行五人手持「捍衞選舉廉潔」等示威標語，又展示「抗議賄選舞弊行為，堅決捍衞廉潔選舉」嘅橫額。
批評以物質影響選民意向
楊彧話，投票當日已經收到相關錄音，批評有人明顯利用物質影響選民投票意向，涉嫌違反《選舉（舞弊及非法行為）條例》，希望廉署秉公徹查，唔好畀貪污買票風氣入侵香港選舉。
鄭泳舜回應指，佢同競選團隊喺參選過程都遵守選舉法例，如果有人懷疑選舉活動涉嫌違反選舉條例，應該舉報咁話。不過民協有關錄音喺選舉日收到，但隔咗五日先公開同舉報，唔知係咪要為泛民敗選補鑊，先忽然積極囉！
卓妮