中環出更：黃士心追北極光凍到手機都「休克」
已退居幕後盡情享受人生嘅「旅遊教父」、中華總商會常務會董黃士心（Jackie），一向有班名人粉絲跟住佢玩轉地球。早前Jackie帶咗一個廿幾人嘅超級豪華團去墨西哥及古巴探奇，然後再去被形容為世界上最容易睇到北極光嘅加拿大黃刀鎮(Yellowknife)，結果真係晚晚都睇到極光，足迹遍布地球嘅Jackie都讚嘆「好靚、好新奇」。
今次係Jackie第一次睇北極光，佢話揀黃刀鎮係因為話明有九成機會睇到，唔使好似有啲地方要撞彩先得。喺零下三十幾度嘅地方，一切事物都好新鮮，佢哋喺結咗四、五呎厚冰嘅湖上掘洞「網魚」，結果捉到九條肥美嘅大魚；又坐車轆似坦克車嘅鐵甲車喺冰上行走，仲坐埋狗拉雪橇添。
同名人團友赴墨西哥探奇
雖然好過癮，但係Jackie話當地凍到抽筋，連手機都「休克」，要返到酒店冚被取暖先至「醒番」，真係搞笑。
除咗極光之旅令人振奮之外，Jackie都對瑪雅文化讚嘆不已，一場來到，團友們當然要喺世界遺迹之一嘅墨西哥金字塔前留影喇。今次探奇之旅仲有唔少名人團友，包括中華廠商聯合會永遠名譽會長李秀恒夫婦，不過佢哋玩咗兩星期就返港先，冇跟Jackie繼續追極光。
李秀恒笑稱此行最特別係四季衫帶齊晒，去南美洲古巴及墨西哥似入咗「大蒸籠」，去到落雪嘅多倫多、溫哥華又好似入咗「大冰箱」，結果太太Ivy喺旅程尾段都頂唔住病倒添。
卓妮