政情：盧寵茂撐吳國際 轉戰港大深圳醫院
為病人換肝中途離去嘅香港大學肝膽胰外科兼職副教授吳國際，上月底被港大醫學院人力資源委員會一致決定不獲續約。一直力撐吳國際嘅瑪麗醫院肝臟移植中心主管、港大深圳醫院院長盧寵茂尋日就話，港大深圳醫院可為吳國際提供服務新崗位，仲話唔使由醫管局或港大出糧喎！如果真係咁，咪等於打咗決定唔續約嘅港大醫學院一巴？
盧寵茂出席醫院管理局新春團拜時話，吳國際同港大嘅合約仍有大約三個月先至完結，佢依家仍然喺瑪麗醫院幫手睇門診同埋巡房。盧寵茂以自己出任港大深圳醫院院長嘅聘任形式為例，話港大深圳醫院可以請番吳國際，咁做唔會牽涉醫管局及港大嘅人力安排。不過成事與否，仍要視乎吳國際係咪願意返內地工作，又話吳話未來屬意專注於研究工作喎。