政情：陳健波百無禁忌 新年向梁國權「追數」
常言道欠人錢記得喺農曆新年前還，費事新年流流畀人追數招口舌是非喇！立法會財務委員會主席陳健波（波哥）就百無禁忌，早排出席一個新春酒會時，一見到港鐵行政總裁梁國權就追數，問佢幾時就鐵路發展交文件喎。
交齊鐵路發展文件等開工
波哥一去到酒會已經滿場飛同各方好友傾偈，見到運輸及房屋局局長陳帆都有傾幾句。轉個頭梁國權同佢打招呼，波哥一開金口就話「你幾時交文件上嚟啊？」原來係講緊政府想重建華富邨，波哥話無鐵路點樣叫人入去住，好唔方便o架嘛。問起仲有東九龍線未開始做，梁國權都大嘆一句：「交晒文件畀政府喇」，又話東九龍線嘅二○一四年方案係應該快啲開始做。波哥聽完就無名火起，原來係政府未做嘢，咁佢就要去追陳帆嘞！
另外，波哥話個細仔被騙，事關個個都話讀大學好輕鬆，點知入咗香港科技大學讀經濟後，覺得大學好似中學咁添喎。睇嚟下個畀波哥追數嘅可能係教育局局長楊潤雄嘞！