政情：推介「春天味道」士多啤梨 高佬賢力撐本地農業

日本品種 本地水耕種植

高佬賢話，呢啲士多啤梨係農友去日本試勻晒所有品種後，再將好食品種嘅種子帶返香港，經過研發同改善先至種出嚟嘅。啲士多啤梨外表唔差，粒粒都紅噹噹，離遠已經聞到香味，唔少議員見到都忍唔住攞嚟食，仲大讚夠晒甜。有人仲盛讚有春天嘅味道添，都幾誇張。

高佬賢就透露，呢啲士多啤梨其實係喺觀塘區嘅工廈中採用水耕種植嘅，真係估唔到。佢仲話，希望藉呢啲成功經驗鼓勵農友向高科技發展，尋求更多發展機會，亦可改變大家對農友嘅印象喎。