政情：免費任「玩」DSE 議員奪星唔執輸
新一份財政預算案冇派錢，仲阿「茂」整餅，怪招盡出，話要為明年香港中學文憑試（DSE）所有考生代繳考試費，搞到唔少「超齡中學生」都研究到底可以點樣一雪前恥，甚至乎想入試場搞事，表達政治立場。連班立法會議員都唔執輸話研究報考，有民主派議員仲話要考夠五科添！另一邊廂，有「國師」之稱嘅嶺南大學中文系前助理教授陳雲，就喺社交網站揭開免費DSE嘅驚天大陰謀，睇完真係得啖笑。
慢必反建議搞考試券 避開同年考
工聯會郭偉强就話自己讀社工出身，覺得通識最易考，仲話考到5**嘅話就去做補習名師。佢仲講笑叫另外幾個黨友一人揀一科應考，建議本身係英文系出身嘅麥美娟去考英文科添。身為工程師嘅民建聯陳恒鑌（Ben），同樣揀番自己最擅長嘅物理科去考，因為最容易，唔使再溫書喎。除咗物理，由於佢學緊鋼琴，所以話勉強都會試吓音樂科。不過音樂科唔單止考演奏，仲要考埋樂理知識，睇嚟阿Ben要認真諗清楚先決定喇。
平日喺立法會「逢會必開」嘅人民力量陳志全（慢必），就話要考英國文學、音樂、通識、倫理與宗教、體育五科，而且佢仲反建議，話不如搞考試券，等全港市民一人一世免費考一次DSE，咁就唔怕個個爭住要喺出年考啦。不過，學民主黨胡志偉話齋，如果要考嘅話，要花時間讀番書同考試技巧，所以佢決定明年唔考。議員平日開會咁忙，睇嚟慢必要認真諗吓，係咪仲堅持花時間考晒五科喇。
陳雲引「入吾彀中」典故 暗示係圈套
正當大家研究緊考DSE嘅策略時，「國師」陳雲前日就喺Facebook上揭開免費DSE嘅驚天大陰謀。佢話政府係透過免費考DSE嚟確認考試制度嘅公信力及增加政府嘅信任度，同時要浪費民力。陳雲仲話，唐朝嘅考試係公開考生姓名，考生答乜嘢都會一清二楚，佢仲引用成語「入吾彀中」嘅典故，以唐太宗李世民當年喺御史府話啲考生中晒自己嘅圈套，暗示香港市民或會中計。究竟中咩計呢？莫非係邊個考生玩嘢，甚至在試卷上寫上「香港獨立」口號，當局都記錄得一清二楚？