中環出更：楊偉雄自嘲遲鈍 打機「兩秒玩完」
近年電子競技成為新興產業，新一份財政預算案亦宣布向數碼港撥款一億元，推動電子競技產業發展。電競如此熱門，但原來創新及科技局局長楊偉雄打機亦有一手，以兩秒鐘「神速」玩完。楊偉雄尋日喺電台節目上自爆：「我呢個年紀反應遲鈍，兩秒已經玩完（電競）。」不過，坊間不少電競都係以團隊形式比賽，毋須「單機」，楊偉雄就笑笑口話會「拉埋團隊落水」喎。
稱發展電競要改變家長思想
對於電競，楊偉雄認為係屬人對人的競技，具發展潛力嘅同時，亦有助培養青少年嘅團隊精神。對於社會上覺得電競等於打機，楊偉雄認為一定要改變，並需要培訓出一群正面嘅選手，從而改變家長嘅思想。另外，政府撥款約五百億元投資創新科技業，楊偉雄認為撥款穩健及合適，又話香港喺創科方面落後，長遠而言要追回嘅話，即使撥款一千億元都唔夠，並期望四年後嘅創科開支，由現時嘅一百八十億元，增加到四百五十億元。
卓妮