中環出更：離婚率高 過來人劉坤銘盼家家和睦
近年社會多衝突，原因眾多，仁濟醫院顧問局主席劉坤銘（Roger）就認為家庭因素最緊要，所以佢啱啱開始修讀一個為期五年嘅家庭及婚姻輔導碩士課程，希望到時可以喺教會內或者另設服務中心，幫人解決問題。佢仲話，如果希望社會上人人都能夠和平共處，就要由家庭開始喎！
早前仁濟董事局及顧問局舉行歡宴，Roger一早到場招呼賓客。卓妮問佢忙啲乜嘢，佢就自爆讀緊碩士課程嘅第一年。大家都知Roger嘅前妻係知名藝人羅霖，佢唔諱言經歷咗婚姻失敗，令佢特別想分享呢啲未必人人有嘅人生經歷。佢語重心長話，香港嘅離婚率高達百分之五十，中國內地更加去到百分之六十，製造好多家庭及青少年問題，所以值得關注。
當晚飯局主題係餞別食物及衞生局前局長高永文，食衞局副局長徐德義及常任秘書長謝凌潔貞都有到場。仁濟一眾高層亦踴躍出席，包括董事局主席嚴徐玉珊、副主席馮卓能、顧問局副主席羅嘉穗及做總理嘅女兒周碧淵，仲有做旅行社生意嘅仁濟前主席蔡百泰及仁濟心臟專科醫生譚劍明等人。
高永文診所有功夫茶飲
嚴徐玉珊話，呢餐飯由高永文退任前就開始約，結果到依家先至成事。佢特別感謝高永文任內喺仁濟醫院重建、架構重整及中醫藥發展等方面嘅支持。離開政府後重操舊業開骨科診所嘅高永文就話，歡迎大家去診所探佢，不過唔係去睇病而係去飲茶，因為佢特登喺診所內另闢地方飲功夫茶喎。
卓妮