政情:「三八法規」 周伯展護眼有新招

煲劇、碌電話、打機係現代都市人生活嘅一部分,雖然大家都知道長期近距離望住個螢幕對雙眼唔好,但又實在好難避免!眼科醫生周伯展就話雖然未有科學實證螢幕藍光對眼睛有害,但長期睇住個螢幕會損害視力係眼科醫生界嘅共識,所以佢非常重視護眼,除咗以前成日講嘅「四個廿」,即每廿分鐘就要休息廿秒,望廿呎以外嘅嘢同行廿步外,佢仲話要加埋「三八法規」先至更有效護眼咁話喎。

打機煲劇計工作時間

所謂「三八法規」,周伯展話係每日廿四小時入面,分為八小時瞓覺、八小時工作、八小時消閒娛樂,表面睇落就好似成日都聽,但佢進一步解釋話八小時消閒娛樂係指戶外活動、同朋友聯誼之類,並唔包括打機、煲劇呢啲要望住個螢幕嘅活動,如果一定要打機、煲劇,就要將呢啲計入去工作嗰八小時入面,確保雙眼有足夠嘅休息!

不過醫生都出名工作時間長,亦都有好多時間對住電腦螢幕,唔知周伯展又做唔做到?佢笑笑口咁話盡量啦,有時要做嘢都冇辦法,惟有做多啲運動、多啲郊遊補番數!

第一手消息請下載on.cc東網iPhone/iPad/Android/Windows Phone Apps