魯迅講過，中國人可以分為「做穩了奴隸」同埋「想做奴隸而不得」兩種。其實香港仲有第三種人，賤格下流卑鄙無恥，自認「契弟」卻隨時做唔成，冇錯嘞，功夫茶講緊嘅咪就係壹淫媒老闆漢奸黎囉！
話說壹淫媒月初表示，已完成出售香港《壹週刊》業務，點知話口未完又生波折。集團尋日聲稱收到買方知會，由於若干匯款事宜，款項未能電匯至賣方指定嘅銀行帳戶。查實之前成個收購過程已經傳出唔少問題，以致一拖再拖，最終會唔會臨門一腳食詐胡，真係冇人話得埋。漢奸黎口口聲聲賣壹仔正契弟，以為求仁得仁，點不知半天吊，吊吊揈兩頭唔到岸，都咪話唔濕滯。
最好笑係有啲人契弟夢碎，居然發爛渣倒打一耙，漢奸黎洋助手Mark Simon第一時間撲出嚟，聲稱集團廣告業務被人杯葛，收匯銀行曾取消淫媒及漢奸黎多個戶口，言下之意暗示有人「政治打壓」。其實，來說是非者，便是是非人，壹淫媒反中亂港，搞風搞雨，唯恐天下不亂，佢哋搞政治認第二冇人敢認第一，家陣掉番轉頭賴人「政治打壓」喎，根本係賊喊捉賊。
話時話，漢奸黎狗急跳牆，胡亂咬人，查實一啲都唔出奇。係人都知壹淫媒經營不善，七孔流血，年年蝕錢億億聲，連肥佬自己都認，現階段「假自僱，真裁員」只係「前菜」，終極目標係削減七成半人手。就好似一個插緊喉嘅病人畀人掹走條管，漢奸黎突然冇咗呢筆救命錢，唔同你死過至奇。上帝叫人滅亡，必先使其瘋狂，咪就係咁解囉。
可能有人話，漢奸黎一向有美國人罩住，是但派啲狗餅都夠佢過下半世喇。之但係今時唔同往日，美國家道中落，自顧不暇，加上壹淫媒江河日下，就快斷氣，搞搞震嘅能量大大下跌，變成一條冇鬼用嘅走狗，就算美國主子唔一腳伸開佢，狗餅都會有減無增喇，吓話。
仲有喎，漢奸黎過去點宣淫販賤都好，司法機構次次都係高高舉起，輕輕放下；佢充當佔中黑手兼最大金主，至今未被檢控；辱罵及刑恐記者，律政司又唔敢郁佢，除咗因為佢頭上有港英餘孽呢把保護傘，亦因為佢手中有輿論工具，將傳媒公器當成私人武器，想「淝」邊個就「淝」邊個，唔少人都買佢怕。依家就唔同嘞，漢奸黎手中嘅武器唔係生銹就係插草出售，一旦徹底「繳械」咯喎，仲有邊個驚佢，仲有邊個保護佢吖。
始終都係呢句︰多行不義必自斃！近排天口唔好，成日翻風落雨，漢奸賣港賊最好都係留番屋企避避，否則好易出門畀雷劈嘅咋！