政情：葉劉講薪酬 衰多口辣（興）象哥
政府改組中央政策組為「政策創新與統籌辦事處」，倡喺政務司司長辦公室及財政司司長辦公室中央政策組開六個常額職位。立會人事編制小組委員會尋日審議該項目，提到早前招聘政策及項目統籌主任，委員會主席、新民黨主席葉劉淑儀再質疑薪酬過高，「新民黨就一定冇o架喇」，但佢突然話「或者民建聯有喇吓」，點知就辣「興」該黨嘅進出口界議員黃定光（象哥）！
話兩年經驗攞３萬 市場少有
葉劉話高級政策及項目統籌主任薪酬係六萬至九萬元，「超高、非常高」，普通主任都有三萬至四萬八千元，比民間智庫高，想知道政府會點分配職位？改組中央政策組工作小組組長羅志康就話按經驗分配，舉例申請者有兩年經驗就會取得三萬元月薪。
葉劉即刻話如果有兩年經驗就攞三萬元，市場極少有，新民黨就一定冇，或者民建聯有喇吓。象哥就喺位大嗌「無喇喇拉民建聯做咩？」葉劉話問吓咋嘛，唔係得罪你吖。象哥質疑葉劉點解唔問第二個，葉劉就口快快講咗自己個黨「公民力量」（新民黨已同公民力量合併），其實係想問人民力量有冇，又問民主黨有冇，叫象哥唔使咁敏感，唔係得罪佢。