政務司司長張建宗日前發表網誌兇議員，話立法會工務小組同財務委員會若果唔喺四月一日前通過基本工程儲備基金整體撥款嘅話，約九千項近一百億元影響民生嘅工程就會停止。十萬火急之下，工務小組尋日加開會議審議呢個撥款，點知開波幾分鐘之後，就因為民政事務委員會人數不足，工務小組要暫停會議，畀議員到另一會議室「救亡」。
雖則政府對基本工程儲備基金整體撥款劃咗「死線」，但泛民嘅態度依舊係「你急佢唔急」，議員朱凱廸又再重提就基本工程儲備基金嘅整體撥款機制嘅改革建議，包括抽起被視為具爭議嘅項目分開表決，而當局就重申整體撥款涉及嘅項目眾多，若要求任何變更都會帶來重大影響，而主席盧偉國重申要更改撥款嘅制度必須交由財委會決定。講咗咁耐，即係毫無寸進喇！
隨後小組又討論政府擬設農業園，培育農業科技和商務管理知識，初步選址喺古洞南蕉徑約八十公頃嘅農地，多名議員關注其中收回土地以便喺古洞南設立農業園（第一期）嘅撥款，要求當局盡快喺立法會內討論整個新農業政策。