中環出更：梁世昌翻輪椅意外 立會補鑊加斜板
話說立法會福利事務委員會本月初召開會議，期間發生小意外，使用輪椅嘅社會福利署助理署長梁世昌被安排坐喺第二行嘅官員席，結果佢喺上梯級期間意外整個人向後翻倒，而協助佢嘅管事亦受傷，令場面非常尷尬。立法會秘書處火速「補鑊」，尋日話正在添置便攜式輪椅斜板，以方便輪椅人士到達會議室座位。
提醒用者預早通知秘書處
身兼委員會主席嘅社福界議員邵家臻事後話，由於政府當日冇事先知會秘書處梁世昌係輪椅使用者，所以冇安排對方坐喺無障礙直達嘅第一排官員席，而係按已確認嘅座位表，坐喺需要上一梯級嘅第二排。佢又指梁世昌雖然不幸翻倒，幸好冇受傷，反而一名協助佢嘅管事則受傷，要求秘書處作相應改善。
秘書處尋日就回應話，正添置便攜式輪椅斜板，但同時指出，如有出席官員係使用輪椅人士，政府須預早通知秘書處，先可以作出適當安排咁話。
卓妮