中環出更：廢物回收今非昔比 業界嘆環保退步
城市每日都會產生好多廢物，但只要環保工作做得好，好多廢物都可以循環再用，從而減少對環境嘅傷害。香港環保從業員總會會長劉耀成就話，昔日香港嘅廢物回收種類可謂包羅萬有，幾乎任何物件都可以另覓用途，舊時嘅人懂得物盡其用，所以腦海中並冇「垃圾」呢兩個字，但依家香港嘅環保就退步咗嘞！
喺爸爸手中繼承回收業務嘅劉耀成話往日物質不如今日豐盛，莫講話舊木頭或爛玻璃都有其價值，就算係拆樓所剩低嘅舊磚頭，亦可成為另一幢大廈嘅建築材料，只要工人拆樓時盡量保持磚頭完整，回收商就會轉售畀建築商。
劉耀成憶往日「乜都收」
至於食肆每晚剩下嘅冷飯殘羹，佢話回收商收集之後會再供應畀養豬戶用作豬潲之用，但隨着時代變遷，今日為求效率，用推土機夷平舊房舍後嘅破磚敗瓦根本無法再用；鄉郊嘅縮減亦令到養豬戶消失，廚餘乏人問津，只有連同建築廢料同其他家居廢物一併送去堆填區，而廢料回收嘅種類，今日只剩下紙張、金屬同塑膠三種，劉耀成好感慨咁話，以回收嘅角度而言，香港嘅環保唔係進步，而係退步。
該會名譽會長甄韋喬就話一個地方嘅環保行業發展得好，連帶環保水準亦會提高。然而香港嘅環保行業除咗面對土地、人工同運輸成本高等不利因素，政府制訂嘅政策往往口惠而實不至。儘管民間團體都致力推動環保，但由資源回收至製成產品，業界都充當無可取代嘅角色。佢覺得最好係有代議士喺議會為業界發聲，先可以改善政府政策同業界期望有落差嘅情況。
有「中國女股神」之稱嘅劉央舊年成立環總慈善會並擔任主席，佢話一個城市要可持續發展，就唔可以忽略環保工作，所以，佢成立嘅組織期望為環保業界出一分力咁話。
卓妮