香港地唔止法律面前一啲人比另一啲人平等，醫生面前一啲人亦比另一啲人矜貴，同人唔同命，同遮唔同柄，大家睇開啲啦！
港大肝膽胰外科副教授吳國際舊年十月喺瑪麗醫院為病人進行換肝手術期間，突然走咗去私家醫院睇預約症，累到病人開膛破肚等咗三粒鐘。瑪麗醫院尋日公布調查結果，不出所料又係醫醫相護，無人問責，簡直離晒大譜。
據小組所講，吳大國手一早知道私家醫院嘅預約手術，同瑪麗醫院嗰單肝臟移植手術撞期，認為佢冇作出妥善安排，做法不能接受，情況完全可以避免。如果以為講到咁嚴重，應該會有人上身，咁就大錯特錯嘞。講到處分問題，有關方面語焉不詳，一時話名譽僱員有既定人事處理機制，包括警告或終止委任，一時又將個波推畀港大，強調對方有既定人事機制處理，會適時對外公布結果。咪畀人批死，院方無非想等件事丟淡，大事化小，小事化無。
講真，憑常理諗都知道有問題啦。正常人平時約人食飯睇戲都會check清楚schedule，確保唔會撞時間，更何況做手術人命關天。公眾最想知道嘅其中一個細節，係吳大國手當日到底去私家醫院做咩手術，搞到要置公院病人於不顧？瑪麗一句「私隱」做擋箭牌，拒絕透露任何詳情，點講都講唔通。病人具體身份就話私隱啫，手術內容照計冇咩不可對人言啩。不可不知，如果手術迫切性猶有過之，公眾反應或者冇咁大，如果係割盲腸之類嘅手術，就難免令公眾質疑，唔通醫生搵真銀大過天，畀咗錢嘅「顧客」先係上帝？
話時話，院方高高舉起，輕輕放下，大家早就預咗咯。出事之後，有主管醫生第一時間力撐涉事同行，聲稱對方只係「捱義氣」嘅外援，冇可能要求全天候on call，直頭多謝都嚟唔切嗰隻，點可能重罰？當然，「外援」就話吹唔脹啫，自己人咯喎，大公無私使乜畀面吖。呢，當日負責主刀、港大肝膽胰外科助理教授黃楚琳，出事冇耐就被調離肝移植團隊，瑪麗方面話就話恒常調動，但早唔郁手遲唔郁手，依家至嚟郁手，話唔係大石砸死蟹搵人祭旗，你信唔信？
之不過又講番轉頭，公院長期十個煲得七個蓋，特別係專科醫生人手更加緊絀，好似涉事醫生咁，要私院公院兩邊走嘅不在少數，人手荒一日唔解決，類似荒謬事件分分鐘陸續有來。
都係古人講得啱，知病之所起，方能治之。醫學界一日繼續自己人查自己人，關起門搞保護主義，醫醫相護嘅亂象始終無法杜絕。