長沙灣海麗邨清潔工疑被房屋署外判商剝削事件，引起社會關注，近日更演變成立法會補選民主派初選嘅新戰場。新界東參選人張秀賢疑被初選對手工黨「截胡」爆料，雙方其後更在網上爆發罵戰，之後連本土派參選人都差埋隻腳落去抽水，令人質疑大家是為民主定鬼打鬼爭選票。
海麗邨新舊外判商被質疑有密切關連，惹起圍標疑雲。張秀賢原定前日中午召開記者會，公布其競選團隊早已籌備多時嘅一項研究結果，踢爆多個房署外判商千絲萬縷嘅關係，當中涉及多個新界東屋苑嘅保安同清潔服務合約。
不過，喺記者會開始前個半鐘，工黨成員趙恩來突然搶閘發放新聞稿，披露一批同張秀賢研究差唔多嘅資料，並叫傳媒即時發布，擺明想「截胡」，令人質疑佢有意為身兼工黨主席嘅新界東初選參選人郭永健打擊對手。
張秀賢舉行記者會後，趙恩來再於網上出招，暗寸張秀賢嘅研究結果大部分係佢之前跟進過嘅項目，部分資料更出錯，冤枉咗其中一間被點名嘅外判商。
張秀賢晚上還擊，反指搞錯資料嘅其實係趙恩來，又質疑對方點解放生有關外判商。之後連冇參加民主派初選嘅本土派新界東參選人劉頴匡，亦加入戰團質疑張秀賢出錯。民主派初選將於本月十四日投票，預計有關鬼打鬼爭拗仲會持續一段時間。