政情：立會小組勢圍插領展 林健鋒做睇場擋駕？

半數議員加入小組攞地區分

新成立嘅小組係負責研究公屋同居屋商場、街市同停車場嘅服務狀況，包括由房屋署管轄，以及領展或領展已轉售嘅情況下，租金或商品價格會有咩唔同，並會研究包括回購有關物業等各種方案。領展事宜涉及大量地區議題，而明年就係區議會選舉，建制同民主派陣營都踴躍派人加入，透過小組指出市民對領展嘅不滿，爭取地區分數。小組最後有三十五人加入，即全體議員嘅一半，以小組嚟講，反應可謂相當踴躍。

小組內建制派佔二十人，民主派佔十五人，換言之，下周一小組選主席，建制派享有一貫主動權，據悉已有共識推舉林健鋒擔任主席。建制派內部解釋話，林健鋒屬功能界別，唔使擔心民建聯、工聯會同新民黨等主打地區票源嘅板塊投訴有利益衝突。

建制指副主席亦唔放畀泛民

不過，相信實情係政府考慮到各個陣營都會圍攻領展，為免情況失控，所以叫林健鋒幫手睇住個場，所有嘢都可以喺控制範圍之內。而林健鋒除咗係行會成員，亦係香港總商會嘅立法會代表，為商界護航亦係無可厚非。

民主派方面，據聞將會由公民黨郭家麒或民主黨尹兆堅代表爭取做小組主席或副主席。不過，建制派陣營就透露，除咗主席定咗支持林健鋒擔任，副主席亦唔會放畀民主派，但由邊個擔任就仲未有共識。此外，最近因為狙擊領展而聲稱受到恐嚇嘅新民黨主席葉劉淑儀亦已磨拳擦掌，話唔做小組主席可以喺會上盡抒己見！至於民主派早前以呈請書方式成立專責委員會跟進領展拆售商場問題，葉劉就話到時會同民主派商討，睇吓可唔可以由佢做主席或副主席，睇嚟葉劉真係動真火。