中環出更：任亮憲擬戰港島補選 斥李永達老屈
有「維園阿哥」之稱嘅任亮憲早前突然宣布有意參加三月舉行嘅立法會香港島補選，隨即受到民主黨「老鴿」、前立法會議員李永達狙擊，指佢係香港一間上市中資公司嘅獨立非執行董事，而呢間公司正係獨立股評人David Webb列出不能沾手嘅「謎網50」公司之一，而佢出選亦被質疑係（界刂）民主派選票。任亮憲就反駁，話自己出任有關公司非執董係發揮監察及督導功能。
指做非執董係監督功能
任亮憲喺社交網站留言，話對於日前李永達喺網上嘅質疑同指控本來只係「茶杯裏的風波」，佢已經兩次致電李永達同發送短訊，希望可以交換意見，但一直未獲回覆。佢又話自己係代表一眾股民權益去擔任有關公司非執董，係發揮監督功能，就好似立法會議員主要職能係監督政府同特首施政，絕非「與決策者同一陣線」。
任亮憲又話，香港充斥着「愚笨、偏激、具標籤性的謬論」，令社會加速撕裂同墮落，認為係時間撥亂反正喎。唔知任亮憲同李永達會唔會有機會正面交鋒呢？
卓妮