中環出更：名人馬主分享愛駒改數字名趣事
唔少名人馬主幫愛駒改名喜歡用部分相同字眼，馬迷一睇「乜乜系」就知屬於邊個馬主。早前卓妮喺馬場見到理文造紙創辦人李運強夫婦齊去撐愛駒「八十八十」出賽。咦？李運強嘅愛駒一向叫做「包裝」乜乜，突然轉用咁得意嘅數字，唔通同術數有關？原來只係一時諗唔到改咩名，求其用數字啫。
李運強兒子李文斌話，有一次佢哋有新馬到港，馬會催促提交馬名，由於時間太趕，所以就改個「五十五十」喇。點知呢隻愛駒好生性，第一次出賽就跑出佳績，振奮人心，所以後來就陸續出現「九十九十」、「八十八十」嘅同系馬匹喇！
蘇啟聲：改名改到冇靈感
仁濟醫院前主席蘇陳偉香嘅老公蘇啟聲都係資深馬主，同李運強亦係多年老友。蘇啟聲笑笑口話，改馬名真係改到冇晒靈感，佢見老友嘅數字馬咁生性，所以自己都用「六十六十」同「七十七十」幫名下良駒取名，仲話改名最緊要好玩、開心就得喇！
仁濟總理孫蔡吐媚、次女Nicole同屋企人都有入場，Nicole喺外國讀書，趁返港度假入馬場撐愛駒，孫太話佢哋嘅馬係「威武系」，聽落都威猛啲。
施子清全家開心拉頭馬
香港福建社團聯會永遠名譽會長施子清全家人就開心拉頭馬，事關佢個大仔施榮怡嘅囡囡名下愛駒「南莊加寶」成功跑出。施子清笑言做馬主三十幾年，名下馬匹一直以「南莊」乜乜命名，因為佢嘅家鄉喺福建晋江嘅南莊村，至於「南莊」後面兩個字就由得子孫自己改喇。
卓妮