政情:黃遠輝租地種菜得個吉

俗語話「種瓜得瓜」,不過現實往往充滿意外。身兼多項公職嘅退休銀行家黃遠輝(Stanley)愛上農耕近二十年,喺新界租咗一小幅農地,假日就偷閒去種瓜種菜。不過早前連續三個八號波襲港,加埋呢個夏天連場大雨,搞到Stanley種緊嘅冬瓜全軍盡墨,成個夏季收成只係得個「吉」,非常慘情。

教用樹枝做有機肥料

Stanley話佢試過種出重達三磅嘅冬瓜。但係今年冬瓜嘅花啱啱開,就遇上連場風雨,未能結果,惟有提早準備冬天播種嘅椰菜種子。咁被風雨摧殘嘅冬瓜可唔可以變為肥料呢?呢位農業老手就教路,樹枝樹幹都可以做有機肥料,但係已被果蠅產卵嘅腐爛果實就唔得,因為隨時會令健康嘅農作物被幼蟲感染,造成蟲害添!

笑稱退休後忙過返工

Stanley自六年前退休後即擔任多項公職,難怪佢笑稱仲忙過以前返工,所以嚟緊會減少公職,明年將卸任房委會資助房屋小組主席同能源諮詢委員會成員職務,享受真正退休嘅樂趣。其中一項係去深圳打高爾夫球,點解去深圳?唔通因本地有聲音要求將高爾夫球場用於建屋,而避免有利益衝突?佢就笑住否認,係因為內地高爾夫球會籍平、場地大啫!

第一手消息請下載on.cc東網iPhone/iPad/Android/Windows Phone Apps