政情：山頂區補選葉劉披甲爆「內訌」
隨住原中西區區議員陳浩濂同蕭嘉怡，分別獲政府委任為財經事務及庫務局副局長同政務司司長政治助理，中西區山頂選區同東華選區出現議席空缺。選舉管理委員會喺尋日刊憲，公布兩區補選於十一月廿六日舉行，而提名期就由十月三日至十六日止。新民黨主席、立法會兼行政會議成員葉劉淑儀隨即自爆打算參加山頂區補選，再加上東華選區亦有不同泛民代表表示有興趣，兩個小選區嘅補選出現內訌在所難免。
楊哲安密密落區備戰
山頂選區向來為建制派票倉，而自由黨就曾保有四屆議席。本身係自由黨人嘅陳浩濂進入政府後，自由黨即打算派出前立法會議員楊孝華之子、前教育局局長政治助理楊哲安出戰，近期已見佢頻密現身山頂區，橫額亦陸續喺街頭掛上，出選意味甚濃。早前原自由黨元朗區議員周永勤退黨後，現時該黨只剩七名區議員，所以要保住議席嘅決心不容睇小。
至於新民黨亦曾於今年中出現離黨潮，因前副主席田北辰帶同六名區議員離巢而飽受重挫，所以葉劉過往都多次表示有意派員參加補選分一杯羹，但一直未見疑似候選人嘅身影。居於山頂嘅葉劉趁尋日公布補選日子時自爆，有意披甲上陣參加山頂區補選，更暗批有人辜負選民期望，睇嚟山頂區將會上演建制派內訌。
泛民陣營同樣爭崩頭
至於東華選區原本屬泛民地盤，直至二○一一年蕭嘉怡擊敗有「AV仁」之稱嘅前立法會議員何俊仁胞弟何俊麒，東華選區先被建制派攻陷。今次民主黨計劃收回失地，該黨中委會通過咗由伍凱欣出選，不過親泛民保育組織「中西區關注組」亦有意派出成員羅雅寧出選，而該組織過往亦常與泛民立法會議員陳淑莊同許智峯合作，相信票源會同民主黨有所重疊。
不論山頂定東華選區都出現內訌情況，但兩個選區都有敵對陣營蠢蠢欲動，好似山頂區有「2047香港監察」有意派人參選，而東華選區則有民建聯劉天正開始擺放街站，若然建制同泛民只顧內鬥，分分鐘漁人得利都未定喎！