政情：何君堯被狙擊到英國 執業資格惹疑
立法會議員何君堯向主張港獨者提出「殺無赦」言論餘波未了，有網民曾表示去信英國嘅律師監管機構Solicitor Regulation Authority（SRA），投訴自稱為英國及威爾斯執業律師嘅何君堯，點知就獲回覆指何君堯唔喺當地嘅執業律師名冊上，惹來虛報疑雲。
網民Richard Scotford喺社交媒體Facebook上載咗一封聲稱由SRA發出嘅信件，指未能喺執業律師名冊上搵到何君堯嘅資料，又指會就何君堯自稱係英國及威爾斯執業律師一事作出跟進。
話有必要可開記者會解釋
何君堯隨後喺Facebook拍片回應，指自己喺一九九七年之前，已喺英國拎到執業資格，又話當時香港律師一般能夠喺英國執業，不過「執唔執業係另一回事」，而佢自己就無喺英國執業嘞，所以SRA搵唔到佢嘅資料係正常喎。佢叫嗰啲「一知半解」嘅人做多啲研究，仲話有必要可以舉行記者會解釋清楚，唔怕無謂人挑戰。