有道是︰甲之熊掌，乙之砒霜。一項針對政府高官支持度嘅民調出爐，其中律政司司長袁國強得分喺三司入面包尾大幡，而且支持度仲好似食咗瀉藥咁，跌跌不休，證明市民對佢極其不滿。不過如果調查對象改為反對派政客咯喎，袁國強分分鐘有望榮膺「最受歡迎官員」(口架)！
大家有眼見，袁國強過渡到新一屆政府，唔係因為佢本身表現神勇，啱啱相反，佢老哥上屆任內留低大量爛攤子，如果唔清埋自己留低嘅蘇州屎，冇人肯接手。家陣高鐵一地兩檢安排仍未過關，佔中呢一筆亦係拖得就拖，特別係漢奸黎同埋「佔中三丑」之一嘅「戴妖」等佔中搞手，千呼萬喚未「入去」，袁國強擺明失職，民望唔低殘都冇天理喇吓話。
當然，市民鬧爆係一件事，但對於嗰班搞事政棍嚟講，得一偌大保護傘若此，真係夫復何憾。咪睇反對派政客近日開足火力炮轟港府，左一句製造「政治犯」，右一句「威權政府」，實際上「其辭若有憾焉，其實乃深喜之」，話唔定邊講邊掩住嘴笑添吖！
最近有人以台灣「美麗島事件」受害者自況，真係唔知嘅嚇死，知嘅就笑死。當年台灣國民黨當局對參與抗爭嘅異見人士審判「從快從重」，當事人由事發到入獄，半年都唔到，呢啲就係貨真價實嘅「威權政府」嘞。
反觀香港，佔中收皮近三年，包括漢奸黎在內嘅始作俑者仍然逍遙法外，好不快活，司法當局一時賴「證據太多」，一時話「檢控冇時間表」，死都唔肯告上法庭，除咗驚佢哋背後嘅外部勢力，亦可能係無間道。係人都知，港府入面大把同情佔中嘅黃絲，港英餘孽同漢奸走狗本來就係同氣連枝，檢控一方根本冇可能大義滅親，唔搵藉口死拖爛拖至奇喇。
至於將「雙學三子」同「美麗島」政治犯相提並論，就更加九唔搭八。「美麗島」主犯唔係判無期就係十年以上，邊似香港班友咁自在，幾個月後又一條好漢。仲有，你幾時聽過「政治犯」可以喺獄中打波、練大隻、寫文章甚至鼓動支持者上街(口架)？港府溫柔敦厚成咁，自認「威權」都畀人告「貨不對辦」喇。所以話，反對派政客真係要整番面「再生父母」錦旗畀袁國強至啱數。
諗起真係幾諷刺，當年老董被人話係「民主之父」，跟手CY被譏為「港獨之父」，依家袁司長又成為「反中亂港保護傘」，港產官僚一蟹不如一蟹，坐享高薪厚祿卻添煩添亂，下下要阿爺自己出手清場，咁搞法，乾脆一國一制算罷啦！