兩隻終極敗訴嘅小學雞游蕙禎同梁頌恆，一朝春風得意，一朝身敗名裂；本來好應該靜吓反省吓，誰知一日小學雞，終身小學雞。兩隻小學雞反口覆舌，毫無羞恥感，由始至終冇為佢哋嘅辱民辱國行為有絲毫悔意，試問又點會改過自新，重拾做一個「人」樣啊！
游小學雞被終極ＤＱ後，喺社交網站發表「陳情表」，一時話「自己種下的因，結的果要由自己品嘗」；一時話睇到自己「驕奢躁進」累事……嘩！好似幾有誠意「痛改前非」咁噃！誰知係狐狸精點都會露出尾巴！唔夠一日，游小學雞又喺大氣電波推翻晒前一日嘅所謂「陳情」，批評終院拒絕給予上訴許可，係法院太狹隘詮釋《宣誓及聲明條例》。阿姐，唔通龍門任你搬就可以「宣誓自決」？咁就叫做唔狹隘？游小學雞又為其「驕奢躁進」作更正，死撐其宣誓方式冇問題，並強調宣誓中提到嘅「支那」字眼，並非要侮辱任何人或文化。
一個人對自家文化、歷史，如此鄙薄無知，錯了又不知謙虛，難怪其目光總是游移不定，一臉陰沉、處處不堪，自然會浮現「驕奢躁進」嘅真面目！用「支那」字眼仲死雞撐飯蓋，死不認錯係辱民辱國，兩隻小學雞活喺香港，只會係過街老鼠，人人討厭！
好心兩隻小學雞咪成日攞「民選議員」做擋箭牌自欺欺人啦！有網民怒斥「連宣誓都侮辱國家同民族，有良知嘅選民都會後悔投錯票呀！咁垃圾都喺議會支薪！豈有此理！」兩人早前欠下的立法會薪津合共一百八十六萬元，唔該咪側側膊唔多覺又想拖，快啲回水！最好笑係被問到會否參與立法會日後舉行嘅補選，兩隻小學雞都話「唔會考慮」，總算懵懂一世，精明一時。梗係啦！邊有人仲會選過街老鼠做「尊貴嘅議員」㗎？小學雞仲聲稱「搵到份唔使露面嘅工作維持生計」，哈哈哈，果然鼠有鼠道！