政情：甘文鋒帶團赴台 遊機河收場
屯門區議員甘文鋒早前做團長，原定聯同七名來自唔同政治光譜嘅區議員去台灣參加論壇，趁機同其他亞洲地區嘅議員就社區管治作交流，但最終論壇當日只係得五個人參加，連佢自己都無去到，事關佢因家中有事要急急返港！
因屋企有事急返港
包括新民黨甘文鋒、民協黃大仙區議員施德來在內共八名議員，原定喺早前出發去台灣三日，今次參與嘅議員並非只有建制派，連泛民、佔領行動後先催生嘅「傘兵」區議員都有份參與。不過，本身打算提早出發去台灣嘅沙田區議員黃宇翰及元朗區議員陳思靜，出發當日撞正十號風球而未能如期成行。
至於作為團長嘅甘文鋒更加遊機河收場，佢透露因為屋企有急事，飛抵台灣出席歡迎晚宴後就即刻返港，難怪佢會大嘆可惜，更直言灰到爆添！