政情：陸頌雄清潔工體驗 笠垃圾袋當雨衣

陸頌雄喺Facebook上載咗清潔工人清理路上樹葉同雜物嘅相片，嗰個清潔工人裝備十足，驟眼睇完全認唔出就係陸頌雄本人！而佢身穿嘅臨時雨衣就係取材自垃圾膠袋，一般清潔工人唔夠雨衣嗰陣都會咁樣整件臨時雨衣喇！

希望市民體諒人哋嘅辛酸

佢話早就安排當日去天水圍體驗清潔工人工作以研究外判問題，只係咁啱遇上打風後，所以工作量特別多，而佢當日好認真咁工作咗幾個鐘，包括完成掃地、清理大型垃圾同逐層清理垃圾，而聽日都會繼續去體驗。

體驗過後，佢大嘆清潔工人付出嘅勞力同收入唔成正比，而政府價低者得嘅招標方式亦需要改革，佢更希望市民可以體諒清潔工人嘅辛酸，喺倒垃圾嗰陣可以自律，以減輕清潔工人嘅工作量咁話。