政情：林正財牽頭搞靈實舊生會
邊間醫院有舊生會咁搞鬼，咪就係將軍澳嘅靈實醫院囉！上個星期六成立嘅「靈實舊生會」牽頭人正正係依家嘅行政總裁兼行政會議成員林正財。佢話搞舊生會係想有個平台等啲新舊員工互相交流，一來敍舊，兩來承傳。佢仲聽以前啲前輩講，以前無開會呢回事，大家聚埋喺飯堂就係開會，一樣解決到問題，所以嚟緊都會落多啲飯堂同同事傾吓偈，開少啲會喎！
Fb專頁方便新舊員工聯絡
林正財尋日話靈實醫院將近六十五歲，員工計計埋埋都有過千人，好多退咗休嘅員工想搵番啲舊同事聚吓，但係又唔知點搵，又見到好多新同事唔係好了解醫院嘅背景。於是佢就靈機一觸，諗到喺Facebook整個專頁出來，方便大家聯絡，仲喺上星期六搞咗個聚會，等新舊員工有機會聚首一堂，互相交流。當佢將幾張聚會相擺上Fb，即刻有好多舊員工按「讚」，連移咗民嘅員工都話要返來參加聚會。
至於未來發展，林正財話想起個紀念館，舊年仲特登去挪威攞番佢哋嘅創辦人「司務道教士」嘅南丁格爾勳章返香港，諗住做鎮館之寶，用嚟紀念呢位第一個攞呢個獎嘅香港護士。